يوميات ميمى 1

اختارت المج الى بتحبه عملت النسكافية بتاعها ضمت رجلها واخدتها فى حضنها .

قعدت تبص للفراغ مكنتش عايزة تفكر فى حاجة.

قامت بصت فى الدولاب اختارت لبس بقالها كتير ملبستوش.

نزلت الشارع الى جنب بيتها الى بتحب تمشى فيه كانت سامعه فيروز وجابت ايس كريم

وهى ماشية بتحب الشارع ده لانه بيحسسها انها عايشه فى زمن غير الزمن

بشكل المبانى الى فية بمحلات الرسامين الى بتحب بتتفرج عليها بالمطعم

الى بيشغل نوع الموسيقى الى بتحبها.

كان نفسها الشارع يبقى اطول من كده طول ماهى ماشية كانت بتبتسم فى وش اى حد.

كانت عايزة تحس انه عادى تنزل لوحدها عادى تمشى لوحدها مكنتش عايزه حد يسالها بتفكر فى ايه

عايزه تروح فين

وهى ماشية شافت عيون شبهت عليهم افتكرت ان دى البنت اللى كانت بتاخد معاها الدرس ايام ثانوى سالت نفسها ياترى هتعرفنى اروح اسلم عليها ولا بلاش ؟ قربت منها ابتسمتلها اوى وسلمت عليها كل واحدة فيهم سالت التانية بقيتى فين دلوقتى بس مبقاش فيه كلام تانى الكلام راح فيين ايام ثانوى كانوا ممكن يقعدوا يتكلموا مع بعض ساعة وميزهقوش.

بقت بتتضايق لما تشوف حد كانت تعرفه زمان وقريبة منه ولما تشوفة تحس انه حد جديد لاول مرة بتشوفه

.سالت نفسها ياترى الناس الى نعرفهم ونقرب منهم هما الى بيبعدوا ولا احنا الى بنمشى فى طريق تانى ونعرف ناس تانية .

حست انها مستمتعة بكل خطوة بتمشيها روحت وهى مرتاحة انها شافت الناس فى الشارع عملت حاجة بتحبها .

بصت لنفسها فى المراية قالت شكلها مش هتكون اخر مرة .

وحشتنى يامدونتى العزيزة

فى لحظة من لحظات التجلى كنت قررت انى مش هكتب تانى غير لما احس انى اتصالحت مع نفسى ان كمية الاكتئاب والاحباط الى عندى تروح او على الأقل تخف شوية كفاية كمية الكئابة الى كانت بتشع من مدونتى ههههه اى نعم حصلتلى حاجات مش لطيفة ومش ظريفة بالمرة فى الفترة الى فاتت بس بجد ربنا كبيرر اووى مهما افتكرنا انه بعيد وانه مش سمعنا هو بيبقى قريب مننا اوى بيخفف من همومنا
لما بنحتاجله بنلاقية جنبنا انا ربنا اكرمنى اخير وفتحلى باب لبداية جديده ادعولى ربنا يوفقنى فيها ويخلفى فيها خير عن اى حاجة وحشة
وافتكروا كل ما نحس ان ربنا يعيد عننا هو بيبقى اقرب لينا من نفسنا :)

من غير عنوان

افتكرت ان وهى صغيرة كانت بتروح تشترى الحلويات من كشك عم جرجس وتشترى لعب من المكتبة الى جنبه.

ولما كبرت شوية وحبت القراية بقت كل يوم جمعة تنزل تشترى الجورنال علشان تقرا عبد الوهاب مطاوع

وتعدى على المكتبة الى كانت بتشترى منها لعب علشان تشترى قصص زهور وأدهم صبرى وتكمل بقيت المجموعة.

لما كبرت حبة وسابت مدرستها القديمة الى قعدت فيها ابتدائى واعدادى كانت زعلانة أوى وتقول كل يوم لازم اعدى عليها

انا مدرستى الثانوى كمان جانبها دخلت المدرسة الثانوى الى كانت مامتها وكل خالاتها كانوا فيها اى نعم مكنتش بتحبها

وكانت فعلا كل يوم تعدى من طريق مدرستها القديمة كانها بتحاول تقنع نفسها انها ممكن ترجعلها

كبرت شوية كمان ودخلت الجامعة والجامعة طريقها بعيد عن مدرستها القديمة بس رغم كده الباص الى كان بيوصلها

كان بيعدى من جنبها بس هى حست انها نسيت مدرستها القديمة مبقتش كل يوم تبص من شباك الباص على المدرسة

نسيت الكشك الى كانت بتجيب منه الحلويات نسيت المكتبة الى كانت بتجيب منها قصص زهور وأدهم صبرى

نسيت مدرستها الثانوى الى كانت بتكرها.

بس بعد ما خلصت حبت تفتكر حاجات حلوة زمان كانت بتحصلها وعم جرجس بيديها بوبونى زيادة وصاحب المكتبة بيقولها

ايه الاعداد الى ناقصة عندك علشان اخلى المطبعة تبعتهالى مدرستها القديمة الى شافت وعاشت فيها اجمل ايام فى حياتها حتى مدرستها الى كانت بتكرها واترفدت منها بسبب الغياب .

لاقت عم جرجس مبقاش موجود ولا حتى المكتبة الى جنبة راحت مدرستها القديمة لاقت كل حاجة فيها اتغيرت حتى المدرسين الى كانت بتحبهم مشيوا مدرستها الثانوى كانت عبارة عن قصر اخدوه علشان يرمموه .

يعنى مش هينفع لما تجيب ولاد تقولهم ده الكشك الى كنت بجيب منه حلويات ولا دى المكتبة الى قريت منها اول قصة فى حياتى

ولا دى مدرسة الانجليش الى كنت بعشقها ولا دى المدرسة

الثانوى الى كنت فيها ومامتى كمان كانت فيها بس هتحكيلهوم عن كل ده وتقولهم انه من غير عنوان.

اجمل صدفة

اجمل صدفة لما تبقى ماشى وتقابل حد كان نفسك تقابله من زماااان وكل شوية ترتبوا ميعاد ويبوظ

.................................

اجمل صدفة لما تبقى خارج انت واصحابك ومتبقوش عارفييين رايحين فيين وفجاه يجلكوا افكار غريبة وتروحوا اماكن بعيد وتبقى خروجه احلى كتيررر من الى بتعدوا ترتبوا علشانها اسبوعين تلاته ههههههه

...............................

اجمل صدفة لما تكتشف انك واقع فى قصه حب بالصدفة ومكونتش واخد بالك

..............................

اجمل صدفة لما تتعرف على ناس مكونتش تعرفهم بتشوفهم بس وتكتشف انهم كويسين اوى

.............................

اجمل صدفة لما تكون ليله امتحان بتذاكر حاجه سخيفة ومش طايق نفسك وانت بتذاكرها بس بالصدفه تعرف انها مش عليك اصلا

وانت مسطول بتذاكرها لانك مش بتحضر اصلا

............................

اجمل صدفة لما تعرفك قد ايه الى حوليك بيحبوك زى ما انت بتحبهم

..........................

مش واخدين بالكوا برضه ان احلى واجمل واروع حاجه بتحصل فى حياتنا صدفة

لو سمحتى ياستاذة صدفة تعالى زورينى دايما ;)

وانا كفايه عاليا انى اكون جنبك

قالته مش هقدر اديك الحب الى انت عاوزه

قالها هحاول

قالته هتتعب

قالها عارف ودى مسؤليتى

قالتله ولو مقدرتش مش عاوزه اخسرك وجودك فى حياتى بيطمنى!!!!!!
قالها وانا كفايه عاليا انى اكون جنبك

............
ومرت ايام عمل كل حاجه علشان يسعدها علشان يطمنها الحاجه قبل ما بتفكر فيها بتكون معموله الى يشوفهم يقول انتوا شبه بعض اوى كانت تعبانه اوى انها مش قادره تدي زى ماهو بيدى والى تعابها اكتر انه عمره ما اشتكى عمره ما اضايق من ده كان بيسامحها فى انشغالها عنه فى بعدها كان ممكن يتحمل اى حاجه حتى لو جات قالتله ان واحد قالها انا معجب بيكى ولا هى عاجبها اسلوب شخص معين ولا شخصيته وراحت تحكيله عليه بانبهار وكأن عمرها ماشافت حد رائع زى الشخص الى بتحكى عليه..... بس مقدرتش تحبه مقدرتش تديله مكان جوه قلبها يسكن فيه زى ماهى ساكنه فى كل كيانه

.........
قالته انا الى تعبت مش قادره اخد وبس

قالها بس انا مشتكتش

قالته انت بتتستمتع بتعبك

قالها مش عاوز غير انى اشوفك مبسوطه

قالتله بس انا مش قادره اكون مبسوطه

........
واختفى يوم واتنين قالت لنفسها من حقه يداوى الجرح الى جواه

هيبعد شويه ويرجع تانى .....
بس الغيبه طولت وحست قد ايه هى محتاجله قد ايه يومها مالوش طعم وهو مش موجودقد ايه هى غبيه انها محستش بيه قد ايه هو رائع قالت هتكلمه هتقوله قد ايه هو غالى عليها اكيد هيسمعها اكيد مفتقدها زى ما هى مفتقدها
بس الى رد عليها كان حد تانى حد رد بيه كرامته

حد حبه بجد

حد عرف قد ايه هو رائع

من اول يوم شافه فيه

..............................

كانت ام ابنه الى جاى فى السكه

ولااول مره تقول لنفسها ياريتنى انا كنت ام ابنه

هما ليه بيطفوا النور يامامى

من كام يوم كده نزلت انا وواحده صاحبتى نتمشى ونشترى هدوم المهم واحنا مشين لاقينهم بيقولوا ايه المول هيخفض انوراه من لساعه 8ونص لغايه الساعه 9 ونص نظرا لذكائنا المعهود قعدنا نقول لبعض هما هيطفوا النور علينا ولا ايه هههههههههههههههههههه

شويه وفعلا االمحلات بدات تطفى شويه من انورها لاقيت طفل ملامح البراءه لسه على وشه مش زى العيال الى بشوفهم
تحس انه مقروض كده بس تيجى تكلمه ولا ليه بالبراءه اى صله بيقولها هما بيطفوا النور ليه يامامى هما خلاص هيناموا لاقيت مامته وبجد عاجبتنى جدا وكان معاها اطفال تانيه يعنى حاولى اربعه او خمسه هما تقريبا كانوا قرايب وقفتهم طابور فكرنى بطابور ونيس الى كان بيعمله لولاده شكلهم كاااااان فظييع ههههههههههههههههههههههه وقعدت تقولهم لا ده علشان احنا بنستخدم الحاجات غلط ولازم نقلل من استخدمنا للطاقه الى عاجبنى اكتر ان العيال كانوا بيسالو وعاوزين يفهموا من واقفين بيسمعوا وخلاص ولا عاوزين يقولها انجزى ياماما

ياترى كام واحده هتبقى ام ولا كام واحده ام فعلا ممكن تعمل مع ولادها كده ولا تعلم ولادها انهم ممكن يسمعوا كده?!!!!!

ملحوظه:
محدش يروح سينابون وياكل شيكابون وهو اصلا مش بيحب الحلويات ولا الشيكولاته علشان يتقف فى البطن انا بقولكوا اهو
وبعد كده يروح يجيب هالوبينو من ماك الى هو طعمه سخيف جدا وعلشان يضيع الطعم ده يروح يجيب بوب كورن فراخ
وعلشان يحس انه عارف يتنفس يروح يجيب جرانيتا فراولة علشان بطنه هتبقى خلاط وهتعمل اصوات غريبه ومش هيعرف ياكل حاجه لمده يومين بعد كده انا حذرتكوا ههههههههههههههههههههههههههههه

مين الى سرق الفرحه

فجاه بقت ى حاجه اعملها متعوده اعملها علشان تخرجنى من الموود الزفت الى انا ببقى فيه مبقاش ليها معنى
فجاه الناس الى كنت بعد ما اقعد معاهم ارتاح واحس ان الدنيا حلوه وبعد ما اقعد معاهم محسش بنفس الراحه
فجاه اى حد بقى يعمل حاجه علشان تسعدنى مبقاش فيه حاجه تسعدنى.
بجد ليه حاسه ان دايما فى حاجه جوايا كاسره فرحتى
حاجه بتخلينى امثل انى فرحانه واضحك بس انا مش من جوايا مش سعيده ليه كل حاجه حواليا طعمها اتغير


بجد الحاله موود كئيب اخر حاجه

مشاعر متلخبطه

عارفين احساس لما تبقى محتاج لحد تكون انت اول اهتماته احساس ان وجودك فى حياته
يفرق معاه مش مجرد شخص بقى موجود وخلاص لو اختفيت من حياته الدنيا
بالنسبه له هتفقد حاجات حلوه كتير بس وجودك بيحلى كل حاجه فى حياته

حد بتحس بالامان فى قربه تحس ان ربنا عوضك بيه عن حاجات كتير حصلت
حد يهتم بتفاصيل حياتك لصغيره مثلا مش يفرق انه يجبلك هديه فظيعه فى عيد ميلادك

بس هتفرق معاك اوى لو كان اول واحد يقولك كل سنه واحنا مع بعض

مش يفرق انه يكلمك طول اليوم لكن هيفرق معاك لو انت اول صوت بيسمعه

حد وجودك جنبه هيقربكوا من ربنا مش هيكدب عليك مش هيخونك
حد هيكون ابوك وصاحبك واخوك الكبير قبل ما يكون اغلى حاجه فى دنيتك
حد يبقى مجنون وطاقق زيك بس فى نفس الوقت عاقل عارف ان شاء الله حياتكوا ممكن تمشى ازاى
المهم يحد انت ان مستنياك تيجى

الاتوبيس وبلاويه والى بيجرى فيه

لنفترض مثلا مثلا انك مش معاك فلوس تركب تاكسى كل يوم ونفترض برضه ان المكان

الى بتروحه للاسف مكان مايعلم بيه الا ربنا
ومافيش اتوبيس مكيف بيروح هناك هتعمل ايه يعنى قدامك حل بقى من اتنين الاول انك تتعامل مع المكروباصات

والتانى تعامل مع الاتوبيسات هيئه النقل العام والمينى باص وده حدث اكيد مش مجرد افتراض

هنحكى الحكايه من الاول الاخت ميمى ايام الكليه واه من ايام الكليه والله كانت ايام هنا تنزل تاخد الاتوبيس المكيف

من عند باب البيت
لغايه الجامعه ويوم ما تزنق فى ميعاد الامتحان تاخد تاكسى يعنى كانت مرفهه مرفهه لا متتغروش اوى كده

الموضوع ان مصروفى كان بيخلص موصلات هههههههههههههههههههههههههههههههه

خلصت الكليه وايه بقى قعدت تدور على شغل المهم اتجننت فى مخها وجالها شغل فى المهندسيين

قالت وماله تروح اهى تاخد خبره برضه
مش بقلكوا اتجننت اولا بقى بقت تركب موصلتييين وتقعد فى الطريق ساعتين

تخليوا لما شخص يقضى من تلات لاربع ساعات فى الموصلات اللطيفه الظريفه بتاعتنا

كنت ببقى راجعه لو حد قالى ازيك ممكن اقيم عليه الحد بجد كانت ايام وحشه اوى المهم يعنى

الواحد ايام السيتى ايه كان يركب الصبح يشوف ناس غاسله وشها ناس لو خبطت فيه تقولك سورى

بنتين امامير قاعدين يراجعوا علشان وراهم امتحان تشوف اصحابك الى معاك فى الجامعه

علشان تلحقوا مع بعض المحاضره الى الساعه 8 جيرانك الى متعرفش انهم بيرحوا المشوا ده كل يوم ههههههههههههههههههههههههههههههههههههه
ايام اتوبيس هيئه النقل العام والمينى باص ياساتر يارب تركب تحس ان الناس هتضربك من التبويز

وشكل حضرتك الى مش متعود تركب الحاجات دى التخطبيط عمل على بطال ولو بصيت لواحد

منهم يبقى مستغرب اوى ايه ولو قولت لحد بقى لو سمحت مش عارفه اقف يروح باصص كده وبمنتهى الثقه ايه يانسه انتى مش شايفه الاتوبيس مليان ازااااى

وانا مش قصدى ان السيتى ايه ده حاجه واو او مافهوش عيوب او مابيبقاش زحمه بس مهما كان زحمه مش بحس ان مافيش اكسوجيين ولو واحد شاف بنت وولد بيستهبل معاها وحد بيلزق بيقعدها الكلام ده فى اتوبيسات النقل عام ما بيحصلش ده امر طبيعى مفروغ مننه

وياجماعه الولاد الى بتركب الموصلات الله يكرمك يابنى لما تشوف بنت قوملها هى الى جبته لنفسها

انا عارفه وعملت نفسها سبع رجاله فى بعض وانا ما يتخافش عاليا والكلام ده

بس قوملها انت مافيش حد هيلزق فيك مش هتخاف على حاجه

لما تشوفوا ست كبيره او راجل كبير قوموا ودى على فكره بتحصل نادرا سواء فى الاتوبيس او السيتى ايه !!!!!!!!!!

وانت ياحاج انت وهو متبقاش متجوزش وعندك عيال قد الانسه الى بتلزق فيها وتعمل كده

افتكر ان ولادك حتى لو مش بيركبو موصلات ربنا هيسلط عليهم الى يعمل كده

كل الى فوووق ده كوووم بقى والاستاذ ميكروباااص ده كوم تانى تحس انك مش هتروح بيتكوا

النهارده ياما الميكروباص هيتقلب بيك من فوق الكوبرى ياما هتخبط فى العربيات الى ماشيه

وبرضه الميكروباص هيتقلب ياما واحد ظريف مش مكفيه الكرسى الى قاعد فيه وخلاص شويه هيقعد على رجلك

ياما بقى تركب ميكروباص فقه عمال بمعنى ميكروباصات بتروح المدن الجديده فالعمال الصبح بتروح تشتغل هناك

وانا مش بتريق على العمال ولا على بيشتغلوا

بس انا ياجماعه مش متعوده على الجوو ده معلش مش قولتلكوا كنت مرفهه

وفى الاخر برضه سواق الميكروباص هيبقى حافظك

ويقول الانسه دى تقعد على الحرف علشان بتنزل ميدن لبناااااان ههههههههههههههههه

هههههههههههههههههههههه

كفايه رغى بقى كده :D:D

ميمى ووقعاته

يارب ربنا يكرمنى واروح مشوار من غير ما اقع والناس تتلم عاليا

عارفين احساس انك كل م تمشى فى حته حد يشنكلك وتروح واقع وانت اصلا مش عارف ايه الى وقعك
مره اتكعبل فى زلطه ومره فى طوبه وبقى ايه لو ملقتش حاجه خاالص بوقع نفسى بنفسى ههههههههههههههه
بس اكتر واقعتين ماثرييين فيا حاليا واحده كانت فى الكليه نازله مع صاحبتى فى امان الله والاقى نفسى واخده سلم الكليه زحلقه تقوم الاخت عامله ايه بقى عامله تضحك مش قادره تمسك نفسها من الضحك والكليه كلها جات تشوف ايه حصلى وهى لسه مكمله ضحك ههههههههههههههههههههههههههههههههههههههههههههههههههههههههههههههههههههههههههههههههههه

تانى واحده كانت ماشيه انا وختى وشوفت واحده صاحبتى جايه علشان اخضها من ورا ولسه برحلها لاقتنى فى الارض بس ايه بقى مش اى واقعه دى على وشى قولت الله وشى اشتلفت واختى اصلا مش اخدت بالها انى وقعت الا لما الناس اتلمت بصراحه ونعم الناس الى ببقى معهم وانا بقع هههههههههههههههههههههههههههههههههههههههههههههههههههههههه

بجد بجد محدش يلبس بناطيل طويله وخليكوا كماشين باصيين رجليكوا ماشيه فييين ههههههههههههههههههههههههههههههههه

بصوا بقى انا زهقت بجد زهقت

ايه الملل الى الواحد بقى فيه ده النهارده زى بكره زى بعده مبقاش فيه لاحاجه جديده ولا بقيت
اصلا عاوز استنى حاجه طيب انا هحكموا بجد انا واحده خريجه زى الفل المفروض المفروض انى دماغى نضيفه
قدمت فى مليون مكان وكل الناس عاوزين خبره طيب اجبلهم خبره منين طيب شغلونى ادونى خبره لا وكمان ايه
فى ازمه عالميه على راى وحده صاحبتى كنا نشتغل نحسنا العالم وحصلتله ازمه هههههههههههههههههههههههههههه

.... طيب لا والناس اللطيفه الظريفة الى كل ما تشوفك بقى ويحسسوك بالشفقه على اساس خلاص بقى انك المفروض خلاص
كده وايه ياحبيبتى ملقتيش شغل ولا مش بالكلام بقى نظرات ومصمصه شفايف بقى الحمدلله انهم لغايه دلوقتى مش دخلونى موسوعه انى
لسه متخطبش ولا اتجوزت

..... اانا كمان بصرحه كده مش واخده على قده لبيت دى يعنى الاول كنت فى الجماحه وكنت بقعد لغايه ما يقفلو الكليه ويقولولنا يلا شطبنا
ههههههههههههههههههههههههه وكمان كنت روحت اعدت تلات شهور فى مكان زى الفل بجد زى الفل اقعد كده لا شغله بقى ولا مشغله قولنا نتعلم حاجه جديده كل ما ابدا فى حاجه واقول ربنا هيهدينى احس انى بعملها من غير هدف ازهق ما هو مافيش حاجه بتحصل خلاص
بقيت اقعد اكلم نفسى يمكن انا مقصره الصراحه فى موضوع انى اتعلم حاجه جديده بس عاوزه احس ان فيه امل فى حاجه هتتغير هو انا كده غلطانه

فضفض

النهرده اول يوم لي كتب فى بلوج وبتاع ومكنتش عارفه ابتدى بايه بالظبط

المهم المهم يعنى احنا هنبد بفضفضه يعنى اى حد عاوز يفضفض باى حاجه يقول

انا هبدا بى نفسى انا ياجماعه متخرجه من كليه من كليات القمه زى ما كانوا بيقولن زمان بس هى الظاهر مش بقت فارقه كنت حاسه ان الدنيا بعد التخرج هتبقى وردى بس الظاهر انى كنت غلطانه ده انا اخدت فوق دماغى احم احم يلا بقى شاركونى علشان احكيلكوا على معاناتى الجامده مع الانترفيهاااااااات