الأربعاء، 10 نوفمبر 2010

مش هخليك ذكرى


مش هتبقى بالنسبة ليا جزء من ذكرياتى الى فاتت
مش هحكى ايامنا مع بعض كانت ازاى
مش هجاوب على كل حد بيسالنى اتعرفتوا ازاى وامتى
مش هبص لاى حاجة حصلت واحنا سوا على انها ماضى
هجبر ذاكرتى انها دايما تحس انك حاضر ومستقبل
هشيل كل حاجة متعلقة بيك من خانة الذكريات
مش لانى مش عايزة افتكر اول يوم شوفتك
ولا مش عايزة افتكر اول يوم حسيت انى بحبك
ولامش عايزة كل يوم واحنا سوا وكنت بحسد نفسى عليك فيه
ولا مش عاوزة افتكر انى كل لما بكون لوحدى فى مكان
ببقى ازاى عايزة اجرى عليك واقولك المكان ده انا شوفت فيه ايه وازاى
بص مش هخليك ذكرى فى دماغى احكى عنها

الخميس، 14 أكتوبر 2010

لما البس دبلتك


النهاردة صحيت على احساس مش عارفة اوصفه اذا كان سعادة
ولا امل فى حاجة نفسى تحصل
ولا احساس غريب
انا هقولك على الاحساس ده بقى وخلاص انا حسيت انى هفتح عينى الاقى دبلتك فى ايدى
لا مش هلاقى الخاتم بتاعى الفضة الى بحبه
لا انا هلاقى الدبلة الى نفسى فيها تعرف ان شكلها حلو اوى على ايدى
مش عارفة ليه تخيلت انه بجد اصل كل حاجة بتحصلى من يوم ما عرفت انك اخترتنى مش مصدقاها
مكنتش مصدقة انك اخترتنى
انا كنت عاوزه اشوف تعبير كل الناس الى نعرفها
كانوا مستغربين اوى اصل احنا مش شبه بعض فى حاجة
عارف كنت دايما عندى فضول هى البنت الى هتحبها دى عاملة ازاى هتبقى هادية زيك كده
واحده بتحسب كل خطوة بتعملها
علشان كده مكنتش متوقعة انه يبقى انا
زى ما بتقولى الشقية الى بتملى الدنيا حوليها دوشة وقلبان
......
علشان كده مكنتش مستغربة انى هفتح عينى الاقى دبلتك
عارف كمان كنت متخيلة ان الدبلة دى مش عليها اسمى ولا اسمك ولا حتى تاريخ الخطوبة
ده تاريخ اول يوم كلمتنى فيه ولا اقولك هنخليه اليوم الى انا كلمتك فيه
وتخيلت اننا كل ما واحد فينا هيبص للتاريخ ده هيبص ويبتسم اصله كان من ضمن الحاجات الغريبة الى حصلت من يوم ما اخترنا بعض
اصله نفس اليوم الى اتاكد فيه انك برضه الشخص الى بدور عليه
......
ولما فتحت عنيا يمكن مكنش لاقيت دبلتك
بس الغريب بقى انى لما بصيت لايدى لاقيت مكانها زى ما تكون كانت موجوده
والغريب اكتر انى كنت مبسوطة من الاحساس ده
احساس انى لما ابلس دبلتك ان شاء الله هكون مبسوطة اوى

الأربعاء، 7 يوليو 2010

دعوة فرح



لاقيتها ماشية قدامى بفستانها الابيض فى عينها الف فرحة
فى قلبها الف امل لدنيا جديدة دنيا مليانة فرحة وحب
لاقيت اصحابها حوليها وهى وردة فى وسطهم
.......
لاقيت بابها بيوصلها لايد حبيبها
الى لاقيت فى عينه كل اللهفة والحب ليها
لاقيتهم سوا زى العصافير الى كانوا بيدورا على بعض واخيرا اتلاقوا
عنينها قالته خلاص جه اليوم الى بعده عمرنا ماهنتفرق
وعينه ردت عليها بحبك لاخر لحظة فى عمرى
.......
عينيا دمعت من كتر السعادة الى فى قلبى ليها
وقلبى دعالها يبعد عنها كل شر ويحفظها من كل عين

الجمعة، 28 مايو 2010

هل تعلم من اكون


يامن تصفنى بالملاك هل تعلم من اكون
فانا لست ذلك الملاك
فأن اقتربت ستكتشف انك اقتربت من النار ..التى لن تحرقك ابدا
ارجوك ان تحفظ ذلك الوعد لن اجعلك تعرف من اكون
سأجعلك تتسأل كل يوما اذا كانت افعالى ملائكية
ام انها افعال شخص ملىء بالمجون
............
اتصفنى بالملاك فلتدخل الى عالمى
لترى هذا الملاك بعطفه وحنانه
ليعترف امامك بكل زلاته واخطاؤه
...............
لن يكون امامك كملائكة الاساطير
سيكون ماهو عليه وليكن ما يكون
وعليك الاختيار

الثلاثاء، 9 فبراير 2010

لان مافيش حد يستاهل ياخد منها نفسها

وجودها جنبه كان محساسها ان فى حاجه بتتاخد منها مش هى دى الى بتتكلم
مش هى دى الى بتتعامل كل شوية حاجه بتتاخد ومش عارفة ايه هى
بس الحاجة دى بقت حاجات مش مجرد احساس انها مفتقدة حاجه فى نفسها
بس مكنتش حاسه ان ده مضايقها ..صحيح هو كان عايز يغيرها
مش عايز جمودها..لانه فى نظره عدم احتياج ليه
مش عايز طموحها ..لانه فى نظره مش هيخليها انثى
مش عايز جنونها..لان ده فى نظره هخليه يغير عليها
مش عايز..مش عايز..مش عايز
هو نجح انه يغيرها..نجح انه يحولها لتمثال هو عمله
بس بعد ما نجح فى ده اكتشف ان مش ده التمثال الى كان عايزه
اتهامه ليها ان معندهاش شخصية وان اى حد ممكن يسيطر عليها كان صدمها
عدم اهتمامه بيها واكتشافها انه وصلها لمرحلة انها تطلب منها يسال عليها
ورده عليها بان ده هيحصل بطريقة انه بيأدى واجب..وانه خلاص مش باقى عليها..انه مبقاش مضايق انها هتبعد او ان حد تانى ياخد مكانه
خلاها بقت عاملة زى لوح الازاز الى وقع اتكسر وبعد كده حد داس عليه لغايه ما فتفته
بس هى قررت انها تلم الى باقى منها وتبعد اكبر مسافة ممكن تقدر عليها
هتسيبه لوحده يكتشف انه مكنش يستاهلها..حتى عدم اكتشافه لقيمتها مش فارق معاها
بس قررت ان عمر ما حد هياخد منها حاجه تانى ..انها هترجع لنفسها تانى
حتى اذا حد دخل حياتها تانى مع اول احساس ان فى حاجه يتتاخد منها هيبقى قررها الاول البعد
لا مافيش حد يستاهل انه ياخد منها نفسها