دعوة فرح

لاقيتها ماشية قدامى بفستانها الابيض فى عينها الف فرحة
فى قلبها الف امل لدنيا جديدة دنيا مليانة فرحة وحب
لاقيت اصحابها حوليها وهى وردة فى وسطهم
.......
لاقيت بابها بيوصلها لايد حبيبها
الى لاقيت فى عينه كل اللهفة والحب ليها
لاقيتهم سوا زى العصافير الى كانوا بيدورا على بعض واخيرا اتلاقوا
عنينها قالته خلاص جه اليوم الى بعده عمرنا ماهنتفرق
وعينه ردت عليها بحبك لاخر لحظة فى عمرى
.......
عينيا دمعت من كتر السعادة الى فى قلبى ليها
وقلبى دعالها يبعد عنها كل شر ويحفظها من كل عين

هل تعلم من اكون

يامن تصفنى بالملاك هل تعلم من اكون

فانا لست ذلك الملاك

فأن اقتربت ستكتشف انك اقتربت من النار ..التى لن تحرقك ابدا

ارجوك ان تحفظ ذلك الوعد لن اجعلك تعرف من اكون

سأجعلك تتسأل كل يوما اذا كانت افعالى ملائكية

ام انها افعال شخص ملىء بالمجون

............

اتصفنى بالملاك فلتدخل الى عالمى

لترى هذا الملاك بعطفه وحنانه

ليعترف امامك بكل زلاته واخطاؤه

...............

لن يكون امامك كملائكة الاساطير

سيكون ماهو عليه وليكن ما يكون

وعليك الاختيار

لان مافيش حد يستاهل ياخد منها نفسها

وجودها جنبه كان محساسها ان فى حاجه بتتاخد منها مش هى دى الى بتتكلم

مش هى دى الى بتتعامل كل شوية حاجه بتتاخد ومش عارفة ايه هى

بس الحاجة دى بقت حاجات مش مجرد احساس انها مفتقدة حاجه فى نفسها

بس مكنتش حاسه ان ده مضايقها ..صحيح هو كان عايز يغيرها

مش عايز جمودها..لانه فى نظره عدم احتياج ليه

مش عايز طموحها ..لانه فى نظره مش هيخليها انثى

مش عايز جنونها..لان ده فى نظره هخليه يغير عليها

مش عايز..مش عايز..مش عايز

هو نجح انه يغيرها..نجح انه يحولها لتمثال هو عمله

بس بعد ما نجح فى ده اكتشف ان مش ده التمثال الى كان عايزه

اتهامه ليها ان معندهاش شخصية وان اى حد ممكن يسيطر عليها كان صدمها

عدم اهتمامه بيها واكتشافها انه وصلها لمرحلة انها تطلب منها يسال عليها

ورده عليها بان ده هيحصل بطريقة انه بيأدى واجب..وانه خلاص مش باقى عليها..انه مبقاش مضايق انها هتبعد او ان حد تانى ياخد مكانه

خلاها بقت عاملة زى لوح الازاز الى وقع اتكسر وبعد كده حد داس عليه لغايه ما فتفته

بس هى قررت انها تلم الى باقى منها وتبعد اكبر مسافة ممكن تقدر عليها

هتسيبه لوحده يكتشف انه مكنش يستاهلها..حتى عدم اكتشافه لقيمتها مش فارق معاها

بس قررت ان عمر ما حد هياخد منها حاجه تانى ..انها هترجع لنفسها تانى

حتى اذا حد دخل حياتها تانى مع اول احساس ان فى حاجه يتتاخد منها هيبقى قررها الاول البعد

لا مافيش حد يستاهل انه ياخد منها نفسها

يوميات ميمى 1

اختارت المج الى بتحبه عملت النسكافية بتاعها ضمت رجلها واخدتها فى حضنها .

قعدت تبص للفراغ مكنتش عايزة تفكر فى حاجة.

قامت بصت فى الدولاب اختارت لبس بقالها كتير ملبستوش.

نزلت الشارع الى جنب بيتها الى بتحب تمشى فيه كانت سامعه فيروز وجابت ايس كريم

وهى ماشية بتحب الشارع ده لانه بيحسسها انها عايشه فى زمن غير الزمن

بشكل المبانى الى فية بمحلات الرسامين الى بتحب بتتفرج عليها بالمطعم

الى بيشغل نوع الموسيقى الى بتحبها.

كان نفسها الشارع يبقى اطول من كده طول ماهى ماشية كانت بتبتسم فى وش اى حد.

كانت عايزة تحس انه عادى تنزل لوحدها عادى تمشى لوحدها مكنتش عايزه حد يسالها بتفكر فى ايه

عايزه تروح فين

وهى ماشية شافت عيون شبهت عليهم افتكرت ان دى البنت اللى كانت بتاخد معاها الدرس ايام ثانوى سالت نفسها ياترى هتعرفنى اروح اسلم عليها ولا بلاش ؟ قربت منها ابتسمتلها اوى وسلمت عليها كل واحدة فيهم سالت التانية بقيتى فين دلوقتى بس مبقاش فيه كلام تانى الكلام راح فيين ايام ثانوى كانوا ممكن يقعدوا يتكلموا مع بعض ساعة وميزهقوش.

بقت بتتضايق لما تشوف حد كانت تعرفه زمان وقريبة منه ولما تشوفة تحس انه حد جديد لاول مرة بتشوفه

.سالت نفسها ياترى الناس الى نعرفهم ونقرب منهم هما الى بيبعدوا ولا احنا الى بنمشى فى طريق تانى ونعرف ناس تانية .

حست انها مستمتعة بكل خطوة بتمشيها روحت وهى مرتاحة انها شافت الناس فى الشارع عملت حاجة بتحبها .

بصت لنفسها فى المراية قالت شكلها مش هتكون اخر مرة .

وحشتنى يامدونتى العزيزة

فى لحظة من لحظات التجلى كنت قررت انى مش هكتب تانى غير لما احس انى اتصالحت مع نفسى ان كمية الاكتئاب والاحباط الى عندى تروح او على الأقل تخف شوية كفاية كمية الكئابة الى كانت بتشع من مدونتى ههههه اى نعم حصلتلى حاجات مش لطيفة ومش ظريفة بالمرة فى الفترة الى فاتت بس بجد ربنا كبيرر اووى مهما افتكرنا انه بعيد وانه مش سمعنا هو بيبقى قريب مننا اوى بيخفف من همومنا
لما بنحتاجله بنلاقية جنبنا انا ربنا اكرمنى اخير وفتحلى باب لبداية جديده ادعولى ربنا يوفقنى فيها ويخلفى فيها خير عن اى حاجة وحشة
وافتكروا كل ما نحس ان ربنا يعيد عننا هو بيبقى اقرب لينا من نفسنا :)

من غير عنوان

افتكرت ان وهى صغيرة كانت بتروح تشترى الحلويات من كشك عم جرجس وتشترى لعب من المكتبة الى جنبه.

ولما كبرت شوية وحبت القراية بقت كل يوم جمعة تنزل تشترى الجورنال علشان تقرا عبد الوهاب مطاوع

وتعدى على المكتبة الى كانت بتشترى منها لعب علشان تشترى قصص زهور وأدهم صبرى وتكمل بقيت المجموعة.

لما كبرت حبة وسابت مدرستها القديمة الى قعدت فيها ابتدائى واعدادى كانت زعلانة أوى وتقول كل يوم لازم اعدى عليها

انا مدرستى الثانوى كمان جانبها دخلت المدرسة الثانوى الى كانت مامتها وكل خالاتها كانوا فيها اى نعم مكنتش بتحبها

وكانت فعلا كل يوم تعدى من طريق مدرستها القديمة كانها بتحاول تقنع نفسها انها ممكن ترجعلها

كبرت شوية كمان ودخلت الجامعة والجامعة طريقها بعيد عن مدرستها القديمة بس رغم كده الباص الى كان بيوصلها

كان بيعدى من جنبها بس هى حست انها نسيت مدرستها القديمة مبقتش كل يوم تبص من شباك الباص على المدرسة

نسيت الكشك الى كانت بتجيب منه الحلويات نسيت المكتبة الى كانت بتجيب منها قصص زهور وأدهم صبرى

نسيت مدرستها الثانوى الى كانت بتكرها.

بس بعد ما خلصت حبت تفتكر حاجات حلوة زمان كانت بتحصلها وعم جرجس بيديها بوبونى زيادة وصاحب المكتبة بيقولها

ايه الاعداد الى ناقصة عندك علشان اخلى المطبعة تبعتهالى مدرستها القديمة الى شافت وعاشت فيها اجمل ايام فى حياتها حتى مدرستها الى كانت بتكرها واترفدت منها بسبب الغياب .

لاقت عم جرجس مبقاش موجود ولا حتى المكتبة الى جنبة راحت مدرستها القديمة لاقت كل حاجة فيها اتغيرت حتى المدرسين الى كانت بتحبهم مشيوا مدرستها الثانوى كانت عبارة عن قصر اخدوه علشان يرمموه .

يعنى مش هينفع لما تجيب ولاد تقولهم ده الكشك الى كنت بجيب منه حلويات ولا دى المكتبة الى قريت منها اول قصة فى حياتى

ولا دى مدرسة الانجليش الى كنت بعشقها ولا دى المدرسة

الثانوى الى كنت فيها ومامتى كمان كانت فيها بس هتحكيلهوم عن كل ده وتقولهم انه من غير عنوان.

اجمل صدفة

اجمل صدفة لما تبقى ماشى وتقابل حد كان نفسك تقابله من زماااان وكل شوية ترتبوا ميعاد ويبوظ

.................................

اجمل صدفة لما تبقى خارج انت واصحابك ومتبقوش عارفييين رايحين فيين وفجاه يجلكوا افكار غريبة وتروحوا اماكن بعيد وتبقى خروجه احلى كتيررر من الى بتعدوا ترتبوا علشانها اسبوعين تلاته ههههههه

...............................

اجمل صدفة لما تكتشف انك واقع فى قصه حب بالصدفة ومكونتش واخد بالك

..............................

اجمل صدفة لما تتعرف على ناس مكونتش تعرفهم بتشوفهم بس وتكتشف انهم كويسين اوى

.............................

اجمل صدفة لما تكون ليله امتحان بتذاكر حاجه سخيفة ومش طايق نفسك وانت بتذاكرها بس بالصدفه تعرف انها مش عليك اصلا

وانت مسطول بتذاكرها لانك مش بتحضر اصلا

............................

اجمل صدفة لما تعرفك قد ايه الى حوليك بيحبوك زى ما انت بتحبهم

..........................

مش واخدين بالكوا برضه ان احلى واجمل واروع حاجه بتحصل فى حياتنا صدفة

لو سمحتى ياستاذة صدفة تعالى زورينى دايما ;)