عيد ميلاده وهو مسافر

عيد ميلاده وهو مش موجود كان مختلف شوية قولتله كل سنه وانت طييب نزلت اشتريت الهدية الى بقالى كتيير بحضر فيهاا

واشتريت معاها كارت وكتبتله وحشتنى اوى

كل مرة

كل مرة بجى اوصلك فيها وانت مسافر وانا نازله على السلم بقوول لنفسى بطلى شغل العيال واكبرى بقى دى مش اوى مرة وانتى خلاص اتعودتى على كده .

كل مرة هبطل اعيط وانا مروحة علشان مش هشوفك لمدة كبيرة.

كل مرة بقول لنفسى انا هرووح انام بقى وابطل تفكير انت هترجع امتى واستنى مكالمتك لما توصل وانى هصحى من النوم على رنة الموبايل.

كل مرة ببقى عايزة أبطل افتح كل الورق الى فيه خطك علشان احس انك لسه معايا .

ولما اروح الاقى نفسى بعيط وانا ماشية واروح البيت اشوف كل الورق الى فيه خطك علشان اقرااه مع انى حافظة كل كلمة فيه ولما اجى اناام ميجليش نووم واقول لنفسى ان كل مرة بتبقى اصعب

عايزة اكتب

عايزة اكتب عن نظرة عينك لما تبصلى وتقولى انتى النهاردة زى القمر بحاله.

عايزة اكتب عن احساس القسوة عليا كانك جرااح عاوز تكشفلى كل مناطق الالم والندبات الى عندى علشان اقدر اعالجها ولما تحس ان كشفك ده ابتدى يودينى لمرحلة انهياار تتحول فى ثانية لشخص تانى شخص احن عاليا من نفسى لان صعبت عليك من كتر احساس الالم .

عايزاه اكتب عن بعدك غضبن عنى وعنك عن اقناعى لنفسى كل يوم الصبح انى قادرة اعيش قادرة ان اليوم عادى ما انا بكلمك

كان وجودك الجسدى فى المكااان هو الى بيدنى الاحساس الى انا مفتقداه .

عايزاه اكتب عن احساس اليتم والضعف الى بحسه لما بتووه من غيرك واجرى عليك زى الطفل الى بيدوور على مامته الى ماسك فيها وفجاه مبقتش موجوده .

عايزة اكتب ان وجودك جانبى معنااه امعنوى انك حاجز صد عن اى حاجة تضايقنى عن اى حاجة تخوفنى

عايزة اكتب انه باين عاليا اوى انى محتاجلك .

يعنى ايه

يعنى ايه تبقى حزين ومكسور وفى نفس الوقت مش قادر تصرخ وتقول انا تعباااان انا مخنوووق

يعنى ايه يبقى فيه الف سوور ما بينك وما بين الى بتحبه ونفسك تشوفه ومش قادر

يعنى ايه تبقى وحيد وانت جنبك الف صوت

لما يجى بليييل

استنت طول اليوم انه يرجع من شغله تتكلم معاه
قالت هتحكيله على الجيم الى لعبته جديد
وعلى الموبايل الى عاجبها.. على الكتاب الجديد الى هو غير كتاب بلال فضل ضحك مجروح
الى مطلعش حلو زى كتاب بلال فضل....اتاخر انه يتصل بيها على غير عادته لما يجى بليل بعد الشغل
ولما كلمته قالها انه تعبان ومحتاج ينام وراحت هى تكمل الكتاب الى مش عاجبها ..............

مش هخليك ذكرى

مش هتبقى بالنسبة ليا جزء من ذكرياتى الى فاتت
مش هحكى ايامنا مع بعض كانت ازاى
مش هجاوب على كل حد بيسالنى اتعرفتوا ازاى وامتى
مش هبص لاى حاجة حصلت واحنا سوا على انها ماضى
هجبر ذاكرتى انها دايما تحس انك حاضر ومستقبل
هشيل كل حاجة متعلقة بيك من خانة الذكريات
مش لانى مش عايزة افتكر اول يوم شوفتك
ولا مش عايزة افتكر اول يوم حسيت انى بحبك
ولامش عايزة كل يوم واحنا سوا وكنت بحسد نفسى عليك فيه
ولا مش عاوزة افتكر انى كل لما بكون لوحدى فى مكان
ببقى ازاى عايزة اجرى عليك واقولك المكان ده انا شوفت فيه ايه وازاى
بص مش هخليك ذكرى فى دماغى احكى عنها

لما البس دبلتك

النهاردة صحيت على احساس مش عارفة اوصفه اذا كان سعادة
ولا امل فى حاجة نفسى تحصل
ولا احساس غريب
انا هقولك على الاحساس ده بقى وخلاص انا حسيت انى هفتح عينى الاقى دبلتك فى ايدى
لا مش هلاقى الخاتم بتاعى الفضة الى بحبه
لا انا هلاقى الدبلة الى نفسى فيها تعرف ان شكلها حلو اوى على ايدى
مش عارفة ليه تخيلت انه بجد اصل كل حاجة بتحصلى من يوم ما عرفت انك اخترتنى مش مصدقاها
مكنتش مصدقة انك اخترتنى
انا كنت عاوزه اشوف تعبير كل الناس الى نعرفها
كانوا مستغربين اوى اصل احنا مش شبه بعض فى حاجة
عارف كنت دايما عندى فضول هى البنت الى هتحبها دى عاملة ازاى هتبقى هادية زيك كده
واحده بتحسب كل خطوة بتعملها
علشان كده مكنتش متوقعة انه يبقى انا
زى ما بتقولى الشقية الى بتملى الدنيا حوليها دوشة وقلبان
......
علشان كده مكنتش مستغربة انى هفتح عينى الاقى دبلتك
عارف كمان كنت متخيلة ان الدبلة دى مش عليها اسمى ولا اسمك ولا حتى تاريخ الخطوبة
ده تاريخ اول يوم كلمتنى فيه ولا اقولك هنخليه اليوم الى انا كلمتك فيه
وتخيلت اننا كل ما واحد فينا هيبص للتاريخ ده هيبص ويبتسم اصله كان من ضمن الحاجات الغريبة الى حصلت من يوم ما اخترنا بعض
اصله نفس اليوم الى اتاكد فيه انك برضه الشخص الى بدور عليه
......
ولما فتحت عنيا يمكن مكنش لاقيت دبلتك
بس الغريب بقى انى لما بصيت لايدى لاقيت مكانها زى ما تكون كانت موجوده
والغريب اكتر انى كنت مبسوطة من الاحساس ده
احساس انى لما ابلس دبلتك ان شاء الله هكون مبسوطة اوى